［鮑威爾放水淹七軍，周小川抬櫬決死戰（＊）］唔係講笑，呢幅圖可以震憾你嘅弱小心靈。邊個叫你沽樓沽股票嘅，問下佢係咪同美國為敵。
1. 非金融朋友話，就算火星人打到嚟地球，地球人應該唔係好似Independence Day咁美國總統開戰機—而係會開印鈔機，印更多嘅銀紙
2. 又係呢招？一樓都係呢招架啦
3. 上次先寫過，聯儲局資產負債表突破5萬億（https://bit.ly/39nnM0F
4. ）。都未夠兩星期，話咁快就6萬億都嚟緊頭！
5. 呢個圖，就係美國聯儲局資產負債表，上下其實一樣，但上面係2003-2020。下面係2020年初至今。咁你見到，去到3月，係直角咁飛上去。所以要開個新圖放大睇
6. 粗略計，聯儲局由3月23日至3月30日，就將資產負債表由5.2萬億(5.2trillion,即係5,200 billion)美金，擴到去5.8萬億。即係擴張咗0.6萬億，600billion，600,000 million US Dollar
7. 一日86,400秒，一星期就604,800秒
8. 兩者一除，哈，好齊頭，剛剛好係1秒鐘印100萬美金！
9. 我幾有興趣知，點解咁巧合，真係相當齊頭的。係個機器嘅極限？但大家都知而家只係電腦數字，唔係真係無酸紙變色油墨，亦唔會有摩爾紋。
10. 咁係咪個電腦系統set咗最多係1秒100萬美金？「咁要update 下啦，否則下次唔夠用」
11. 晏啲會再貼圖，你睇到，今次嘅QE4，速度更加係史無前列。完全係有……Rocky洛奇嘅feel．元祖QE1其實最勁，亦好合理，要應付史無前例嘅金融危機，然後去到2同3已經有啲收歛，至少速度上係—然後估唔到第四集仲勁過第一集。
12. 當然了，係咪股票實升？一半半。但你亦可以話唔係出咗QE4，而家股市應該高位跌左一半甚至大半，唔會低位反彈一成幾（港股）甚至兩成幾（美股）。
13. 而同樣地，你可以反駁，日本印咗咁多年錢，都仲係通縮，資產都好似冇乜升（其實係有嘅）。不過至少，我估印yen同印美金又兩回事。而即使在日本，都係有產者爽歪歪，無產者大檸樂嘅世界。
14. 而放水唔會導致資產升，好似唔係好合符常識。問題係，啲錢會走去咩資產。
15. 堅持話嘩眾取寵嘅，「世界咁大，一秒鐘100萬美金唔係好多啫」。你可以同之前幾次QE比較下。以前邊有咁快？我晏啲會貼多張圖
16. 你可以睇返QE1，2 ，3。其實港紙唔係好受惠，至少2同3唔係好受，否則唔會搞咗咁多年都係兩萬幾三萬上上落落。但你見美股就連升10年，樓亦都基本係—唔止港樓，好似全世界絶大多數地方都係。金亦都應該係。
17. 甚至你見到嘅太古城，麥當勞煙肉蛋漢堡，東莞嘅雞價（我聽朋友講。我冇去過東莞，以為得米粉食，有雞的？龍江雞？），米芝蓮餐廳，英國貴族學校學費，全部都係QE。官方話CPI 3%啫，但官方唔食煙肉蛋，亦都唔上東莞。
18. 咁所以，點揀？咪why not all，唔好話投資101冇教你，幾時都教你分散。你啲乜乜大法全部買死一隻匯控，咪一舖清袋咯。我當我買返幾隻，有長江基建（1038）有香港電訊（6823）有恒生（11）有中銀（2388）咁，照計唔會全部停晒掛（＊＊）
19. 環球，唔同資產，樣樣買啲。當然幾時個問題就真係那有錢你老母。咁如果真係得幾皮身家就冇得講。但我就見有啲幾球身家都仲係全部買匯控，都唔係事後先講，事前都知有問題。
20. 亦都仲岔開少少講，雖則本人唔係CFP或乜（但要考話咁易，遲早我就得閒冇嘢做去做），但都即係，差不多所有人問我任何各式投資問題，其實都係好難答你：因為大佬，我要知你本身渣緊乜，收入幾多，會唔會移民，甚至會唔會結婚，層樓有冇老婆名，甚至係你同你老豆老母關係點，佢釘咗層樓係咪你，好多嘅嘢，先答到你應該買乜。所以你求撚其PM我問我XXXX買唔買得，都真係浪費你時間又浪費我時間啫。
21. BTW，都係真的，收費專欄就早幾日已經講，事先張揚嘛。
（＊）其實唔係周小川好耐了，但順口啲。
（＊＊）其實都真係有可能（雖然08冇，今年都唔會），所以咪叫你應該股債6/4 或7/3，但香港冇撚人理你的。最好每年升五成，但冇風險，仲要好低入場費。你啲一年8%回報嘅CFA食屎啦。
—————————————————————————————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
Search